Mentale Sundheit is heel wichtig, dat weet wi opstunns woll all. Besünners wichtig is se aver för öllere Lüüd, de villicht Pleeg bruukt un in en Olenhuus leevt. Soziale Kuntakten, de Uttuusch mit anner Minschen – wo faken fehlt dat doran. Dat sall nu anners warrn.  De Hamborger Health Care-Agentur kwhc hett in Kooperatschoon mit den Quickborn-Verlag de Akschoon “Schenk Dien Tiet – Lees vör op Platt” in’t Leven ropen. Söcht warrt dor ehrnamtliche Vörlesers, de Lust hebbt, in Hamborger Senioreninrichtens plattdüütsche Texten vörtodregen.
Dat weer mi en bannig grote Freid, tohopen mit Carina Dawert un Yared Dibaba bi de Optaktveranstalten dorto op de Bühn to stahn.
Op de Internetsiet plattdeutsch-vorlesen.de  köönt Senioreninrichtens, de plattdüütsche Vörlesens anbeden wüllt, ehr Interess bekunnen. Minschen, de Lust hebbt, ehr Tiet to schenken, köönt dor jüst so op de Siet gahn. Klickt op “Ich will vorlesen” un schon seht ji en List mit Senorenhüüs, de sik över ehrnamtliche Lesers freit. So köönt ji denn direktemang mit’nanner in Kuntakt kamen.

De Vördelen leegt op de Hand. Een lehrt anner Lüüd kennen, kümmt in’n Snack, de Kopp hett ok beten wat to doon – un so ganz blangenbi doot wi de Plattdüütsche Spraak ok noch en Gefallen. Also Lüüd: Schenkt joon Tiet, leest vör op Platt.